СИНОТ НА СВЕТОЗАР, ЈАНЕ ЈАНЕВСКИ, СТАНУВА ПРЕТСЕДАТЕЛ НА УО НА „АУТОМАКЕДОНИЈА“ - и оттаму заминува Џон Илија Јоновски
Објавено во: Економија 02 Мај, 2024
Јане Јаневски, син на познатиот бизнисмен Светозар Јаневски, станува претседател на Управниот одбор на „Аутомакедонија“, заземајќи го местото на Џон Кирил Јоновски, кој досега беше на таа позиција. Оваа промена е заведена во Централниот регистер за земјава.
Она, пак, за што претходно пишуваше Фактор, е дека Џон Илија Јоновски неодамна престана да биде член на Управниот одбор на уште една компанија под контрола на Светозар Јаневски, а таа е всушност „златната кокошка“ „Тиквеш“, која е една од најголемите и најуспешните винарски визби не само во земјава, туку и во регионот и пошироко.
Инаку, како што е заведено во Централниот регистер, нов претседател на Управниот одбор на компанијата која се занимава со трговија на моторни возила, како и трговија на мало со делови за моторни возила, ќе биде Јане Јаневски, кој се запишува, а како претседател на Управниот одбор се брише името на Џон Илија Јоновски од Австралија.
Инаку, Јане Јаневски, заедно со другите две деца на Светозар Јаневски, односно Драгана Јаневска и Кирило Јаневски, поседуваат по 6,78 проценти од акциите на „Аутомакедонија“.
Додека, пак, Иванка Мојсова, која е најголем поединечен акционер, располага со 22,48 проценти од акциите, а втор по големина акционер е Милан Ивановски, со 17,87 отсто од акциите.
Па така, Драгана Јаневска, ќерка на Светозар, која е магистер по сајнс маркетинг, стана членка на Одборот на директори на АД „Тиквеш“ Кавадарци, а исто така член во Одборот на директори стана и Јане Јаневски, еден од двата сина на Светозар, кој е дипломиран економист, како што е наведено во Централниот регистер. Додека, пак, како што тогаш објавивме, член на Управниот одбор престанува да биде Џон Кирил Јоновски, со потекло од Австралија, кој своевремено имаше купено и одредена количина акции од оваа успешна компанија.
Мнозински и доминантен сопственик на ВВ Тиквеш Кавадарци е трговското друштво за инжинеринг и услуги во прометот М-6 ДОО Скопје, кое поседува 80,8 отсто проценти од Тиквеш. А, во М-6 ДОО, пак, доминантен сопственик е фирмата М-6 ЕДЕН ДОО, која поседува 92 отсто од М-6, додека преостанатите 8 отсто во М-6 ги поседува Милан Ивановски. Додека, пак, М-6 ЕДЕН ДОО има тројца сопственици и сите тие поседуваат по една третина, односно по 33,33 проценти од акциите, а тоа се децата на бизнисменот Светозар Јаневски, односно Драгана Јаневска, Кирило Јаневски, и Јане Јаневски, како и Светозар Јаневски, за кого е наведено дека на друг начин остварува контрола на правното лице.