Антикорупциска потврди: Газдата на „Еуровиа“ му донирал на ДУИ повеќе од дозволеното

Добивај вести на Viber

Државната комисија за спречување на корупција потврди дека е прекршен Законот за финансирање политички партии откако излезе информација во јавност дека сопственикот на градежната компанија Ељмедин Адеми лично донирал средства за ДУИ повеќе од дозволеното.

Антикорупциска комисија го затвора случајот и ќе го пријави до Државниот завод за ревизија (ДЗР) и до Министерството за правда како надлежни за надзор и следење на финансирањето политички партии. 

Шемши Салаи од „Антикорупциска“ рече дека се работи за донација за Демократска унија за интеграција (ДУИ) која била поголема од тоа што го дозволува законот, а предметот, рече, го отвориле по сопствена иницијатива врз основа на новинарско прашање. 

Сопственикот Ељмедин лани на ДУИ како физичко лице и донирал 2.509.200 денари, додека правното лице „Еуровиа“ донирало 1.845.000 денари. Според законот, износите на донациите се регулирани и партиите не смеат да примат повеќе од 60 просечни нето плати од правни лица и повеќе од 30 просечни плати во државава од физички лица. 

Од ДУИ ги добиле бараните документи и потврда дека во меѓувреме и самите го констатирале надминатиот износ и донеле одлука средствата заедно со вирмани дека се вратени. 

-Констатирале и дека од два правни субјекта добиле поголем износ и решиле да ги вратат во јули 2023, рече Салаи. 

Сепак, повредата на  член  16 од Закон за финансирање политички партии е направена затоа што парите не се вратени веднаш или најдоцна од 15 дена од нивното донирање. Поради тоа за овој предмет ДКСК ќе ги информира ДЗР и Министерството за правда. 

Градежната фирма „Еуровиа“ од Желино го доби тендерот од Министерството за надворешни работи за преадаптација на Спортскиот центар „Борис Трајковски“ за министерската конференција на ОБСЕ која ќе се одржи во Скопје. Договорот е склучен на 21 август, а работниците веќе започнаа да работат во „Борис Трајковски“. Тендерот е во вредност од 1,8 милиони евра, a според документацијата, предмет на тендерот е „Набавка на работи за внатрешна адаптација и надворешно уредување на Спортскиот Центар „Борис Трајковски“ во функција на одржување на Конференцијата на Министерскиот совет во рамки на претседавањето на Република Северна Mакедонија со ОБСЕ, во декември 2023 година“.