Азески на средби во Виена: Компаниите од Западан Балкан ја прошируваат соработката

Добивај вести на Viber

Размена на практики, знаење и поддршка на шесте комори од земјите од Западен Балкан со што директна полза ќе имаат компаниите гарантира Меморандумот за соработка кој беше потпишан денеска  помеѓу Коморскиот инвестициски форум, Австриската федерална стопанска комора и Австриското федерално министерство за Европа, интеграции и надворешни работи во Виена. Во следниот период компаниите од овој дел на Европа ќе се фокусираат на забрзување на процесот на дигитална трансформација, но и на развивање заеднички програми на средно стручно образование, но и на зајакнување на нивниот бизнис интегритет преку промовирање на чесни деловни практики и спречување на корупцијата. Во Виена е претседателот на Стопанската комора Бранко Азески кој, таму имал неколку средби. Азески разговарал со Карин Кнејсл, министер за Европа, интеграции и надворешни работи во Австриската федерална Влада. 

Од Стопанската комора информираат дека за Кнејсл регионот е нераскинлив дел од економската и социјалната историја на Европската унија и дека процесот на приклучување на земјите од Југоисточна Европа кон ЕУ останува врвен приоритет. 

„Зајакнувањето на регионалната соработка и поддршката за овие земји на нивниот пат кон ЕУ треба да придонесе на луѓето од регионот да им се дадат нови перспективи, при што заемното признавање на квалификациите ќе игра клучна улога во овој процес. Австрија ќе го даде својот придонес особено  преку заложбите во областа на дуалното образование, вели Кнејсл.

За Македонија, Австрија е еден од дваесетте најголеми трговски партнери и еден од најголемите странски инвеститори во земјата. Од комората тврдат дека Австриската федерална стопанска комора е предводник на трендовите и позитивен пример за сите комори од државите на Западен Балкан, затоа што воведува најдобри практики за унапредување на националните економии.

„Потпишувањето на Меморандумот денес е пионерски чекор за ревитализирање и унапредување на оваа соработка, која во една или друга форма ја имавме во регионот долги години наназад. Верувам дека австриските искуства и know-how во областа на дигитализацијата и дуалното образование ќе придонесат за унапредување на нашето работење, но ќе претставуваат и солидна основа за идниот развој не само на македонската економија, туку на економиите на сите држави од регионот на Западен Балкан, како целина, посочил Азески.

Во Виена Азески се сретнал и со Хералд Марер, претседател на Австриската федерална стопанска комора, како и со претставници на менаџментот на водечки австриски компании.