Бектеши: Подготвени сме за скрининг-процесот, Бартолини: Македонската индустрија не е подготвена за ЕУ

Добивај вести на Viber

Кресник Бектеши, министерот за економија, на завршниот настан за проектот Ревизија на индустриската политика рече дека неговиот ресор е подготвен уште денеска за скрининг-процесот, односно за отворање на поглавјата, иако Македонија треба да добие датум за преговори следната година. На ова Никола Бартолини од делегацијата на ЕУ, како раководител на секторот за соработка, возврати дека македонската индустрија не е подготвена за предизвиците во ЕУ.

- Мора да се работи уште сега за индустријата да биде конкурентна кога ќе дојде време, инаку овој сектор ќе страда кога Македонија би била примена во ЕУ. Не треба да се дозволи лесно да заминуваат во странство едуцирани работници, а инспекциите треба да работат подисциплинирано. За младите е потребна подобра и попрактична едукација. Вие може ќе бидете примени во ЕУ за пет до десет години, но потребна е подготвена генерација за тоа. Потребна е конкурентност и дисциплина - рече економистот од ЕУ.

Бартолини додаде дека Македонија водела погрешна политика на ова поле во последните десетина години.

- Никогаш нема да има конкурентност со субвенции. Субвенциите ја влечат економијата надолу. Конкурентноста почнува да се развива кога бизнисот лежи на здрави основи, порача денеска Никола Бертолини од Делегацијата на ЕУ во Скопје на завршниот настан за проектот Ревизија на индустриската политика - вели тој.

Во врска со т.н. Индустриска стратегија што произлезе од проектот, Бертолини напомена дека претставува само појдовна основа - алатка, а не резултат.

- Лесно е да се донесе стратегија и да се стави на полица. Се надевам дека овојпат нема да биде така, бидејќи нема време за губење. Треба да се преземат конкретни активности. Ние сме тука да ви помогнеме, не имате како поддршка, истакна делегатот на ЕУ.

И Софче Јовановска, советник во Кабинетот на вицепремиерот Кочо Анѓушев, подвлече дека ако македонските компании сакаат да обезбедат раст, мора да извезуват. Во моментов има 236 пријави од македонски фирми за субвенции од 50 милиони евра, а 88 насто од компаниите аплицирале за мерките со иновативни проекти.

Проектот „Ревизија на индустриската политика“ се спроведуваше една година со поддршка на ЕУ.

Јасмина Мајсторовска од Министерството за економија потенцираше дека веб-порталот konkurentnost.mk ќе ги обезбеди македонските фирми со сите потребни информации, програми, извештаи, програми и мерки со цел да се подобри нивната ориентација на пазарот.

Ангажираниот консултант Рикардо Пинто рече дека ќе биде обезбедена сета потребна помош за асистенција и обука на кластерите.

- Здруженијата на кластери во Македонија и компаниите се уште се недоволно запознати за тоа како функционираат кластерите во ЕУ - изјави Пинто.

Влатко Данилов, ангажиран на проектот, наведе дека ќе се следат сите активности од само една единица со посебна база на податоци со 50 индикатори за тоа дали се постигнати потребните резултати, бидејќи како што изјави, мониторинг евалуацијата постои дури и во самите устави на некои земји.

Ревизијата на индустриската политика по 15-дневни дебати треба да влезе во владина процедура.

Александар Кузмановски