Белгиските власти ќе ги признаат македонските возачки дозволи?!

Добивај вести на Viber

Ќе се засилува полициската соработка меѓу Македонија и Белгија со договорот потпишан денеска за време на средбта на министрите за внатрешни работи на Македонија и на Кралството Белгија, Гордана Јанкуловска и Жоел Милке. Договорот, смета Јанкуловска е правна основа за полициска соработка  и ги дефинира клучните области во кои постои простор за тоа, јави МИА. „Овој договор овозможува директна, непосредна соработка меѓу полициите од двете земји во однос на прашањата од клучен интерес, а кои претставуваат глобални проблеми и закани за светот во денешницата. Договорот ќе ни овозможи да формираме заеднички истражни тимови што ќе работат на прашања поврзани со глабалните закани како што се сајбер-тероризмот, тероризмот, недозволена трговија со дрога и оружје и луѓе и продлабочување на полициската соработка во областа на организираниот криминал,“, изјави Јанкуловска. Ова е прв ваков договор меѓу Македонија и Белгија, а  дополнителна тежина дава фактот дека денес со големата мобилност на луѓето,често се наоѓаат во ситуација да претстојуваат во една од земјите и потребно е да се има законска основа за постапување кога ќе се соочат со проблем во странство. Тоа е и кога, вели Јанкуловска, на пример македонски државјани го пречекоруваат законот во другата земја за да може соодветната служба да постапува и да го спроведе законот на најбрз можен начин. Според Жоел Милке, важно полициите да ја засилат соработката во однос на борбата против организираниот криминал, насилството, тероризмот. Вели дека е задоволна што веќе има офицер за врски кој е базиран во Албанија и кој има дневни контакти со службите во Македонија. На прашањето дали иницијалната каписла за продлабочување на соработката меѓу македонската и белгиската полиција се т.н. лажни баратели на азил, Јанкуловска потенцираше дека тоа не е единствената причина оти проблемите со кои се соочуваат полициите се многу пошироки од покривање на само едно прашање. „Се разбира дека овој договор ќе значи и дополнителен импулс во соработката на тој план. Радува фактот што по интензивните мерки што заеднички ги превзедовме со белгиските власти, конечно бројот на т.н. лажни азиланти е во опаѓање и бележи драстичен пад кога говориме за Белгија. Тоа е добар пример кој може да го аплицираме на другите држави каде што во моментов проблемот е поизразен“,смета Милке. Таа додаде оти Република Македонија досега има потпишано вкупно 18 договори за полициска соработка, а посочи и дека   е разговарано за можноста за взаемно признавање на возачките дозволи меѓу двете држави, што ќе го олесни и патувањето и комуникацијата меѓу државјаните кои поседуваат возачка дозвола од Македонија или Белгија. „Но, тоа ќе биде предмет на преговори и дополнителни усогласувања и рано е да се говори дали и кога таков договор ќе биде потпишан“, додаде Јанкуловска.