БЕРЗАТА ВО ЗЕЛЕНО: Првичниот шок помина, но какви цени ќе крои војната?

Добивај вести на Viber

Позитивен ден на Македонската берза, откако вчера цените на акциите паднаа остро. Негативната реакција се должеше на нападот на Русија кон Украина, што предизвика страв на инвеститорите ширум светот, а и силна рефлексија на македонскиот пазар на капитал. Сепак денеска, македонскиот берзански индекс МБИ 10 се зголеми за 4,3 проценти на крајот на тргувањето. Сите акции кои го креираат, а и останатите хартии од вредност се во зелено.

Дел од акциите пораснаа денеска за исто толку колку што изгубија вчера, но дел не ја надоместија загубата. Брокерите ширум светот, па и домашните анализираат дека иако реакциите се очекувани, не треба да се дозволи стравот да го умртви пазарот особено поради добрите перформанси на компаниите кои заздравуваат и покажаа одлични резултати и во продолжена пандемија.

Домашните компании сега ги објавуваат резултатите за првиот квартал кои го потврдуваат позитивното очекување. Од Генерали инвестментс велат дека пред каква било емотивна реакција, треба да се погледнат минатите искуства, а историјата од Втората светска војна па наваму во однос на пазарите на капитал не учи дека моментот кога ќе се заостри омразата, стравот е најголем, а расудувањето е најмало. 

„Емоциите ја заматуваат логиката и инвеститорите сакаат само апсолутна сигурност. Но, падовите на главните берзи (САД, Европа) по избивањето на Виетнамската војна, Првата и Втората војна во Ирак, конфликтот во Авганистан и последно, но не и најмалку важно руската окупација на Крим во 2014 година, покажуваат дека е предоцна за промена од поризични капитални инвестиции во посигурни. Краткорочните, политички мотивирани падови на пазарите на капитал често носат со себе долгорочни економски можности, иако инвеститорите гледаат многу мрачна иднина во овие тешки моменти што ги изненадуваат. Но, веќе споменатото искуство сугерира декамора да се одржи инвестициска дисциплина, бидејќи опасноста и стравот носат можности, велат од Генерали инвестментс.

Додаваат дека падот на берзите е привремен и очекуван феномен. 

„Флуктуациите се случуваат затоа што вредностите на финансиските пазари се директно поврзани со социјалните, политичките и економските случувања во светот, вестите и очекувањата на инвеститорите и емотивните одговори на нив, велат од Генерали инвестментс.

А.Т.