Бил Гејтс и други богати луѓе ќе се борат за чиста средина

Добивај вести на Viber

Дел од најбогатите луѓе на светот, меѓу кои и милијардерот Бил Гејтс, се обединија во борбата против климатските промени. 

Една од целите  е запирање на катастрофалните климатски промени кои ѝ се закануваат на планетата. Гејтс вели дека овие пари ќе се вложат во нови потенцијални извори на евтина енергија кои во иднина ќе се користат насекаде низ светот. Според него, овие нови извори мора да бидат достапни за секого и секако да не ја загадуваат животната средина.

Кон оваа инвестиција од една милијарда долари се приклучија и основачите на Amazon, Alibaba, како и многу други бизнисмени вклучувајќи го и поранешниот градоначалник на Њујорк, Мајк Блумберг. Овие пари ќе бидат инвестирани во нови форми на зелена енергија. 

Фондот своите инвестиции ќе ги пласира во целиот свет во следните 20 години. Инвестициите ќе го поттикнуваат производството и складирањето електрична енергија, превозот, индустриските процеси, земјоделството и енергетската ефикасност и друго. 

Гејтс и претходно изјавувал  дека е посветен на активности кои се однесуваат на климатските промени. Проектот го најави пред околу една година. Официјалната најава дојде после преговорите за климатските промени во Париз, организирани од Обединетите Нации.

Бил Гејтс важи за најбогатиот човек на планетата според листата објавена од Форбс. Во проектот учествуваат 20 инвеститори, кои поседуваат  некаде околу 170 милијарди долари.