Битиќи: Преговори со Светска Банка за уште 90 милиони евра

Добивај вести на Viber

Фатмир Битиќи, советникот за економија во премиерскиот кабинет, денеска на прес-конференција во Владата најави дека се преговара со Светска Банка за уште еден заем од 90 милиони евра.

- Се водат преговори со Светска Банка за брз проект во износ од 90 милиони евра. Тој ќе има две компоненти, од кои првата компонента за подобрување на здравствените капацитети и втората за ранливи домаќинства и паричен надоместок за оние кои ги загубиле работните места, рече Битиќи.

Со цел да се трошат повеќе пари во стопанството, вели дека од почетокот на годината за поврат на ДДВ се издвоени 145 милиони евра, односно за 16,7 отсто повеќе од претходната година

- Со цел да помогнеме во надминување на последиците донесена е законска уредба за ослободување на плаќање на данокот на личен доход за март, април и мај 2020, а придобивките досега ги искористија околу 1.200 компании. Никој не е изоставен со мерките, особено по релаксирање на мерките за минимална помош и брз влез во системот за социјална заштита, додаде Битиќи.

Советникот наведе дека до 3 мај има 970 нови барања за нови решенија во центрите за социјална помош.