БИЗНИС ФАЦИ, Ставрески: Тивко заминување на кумот!

Добивај вести на Viber

По седум години на чело на Министерството за финансии, лани ја напушти министерската позиција. Во јуни лани Зоран Ставрески поднесе оставка од функцијата министер за финансии, но и од функцијата потпредседател на Владата - како што изјави од здравствени причини. Ставрески на позицијата министер за финансии лани беше само шест месеци. 

„Здравствените проблеми со кои се соочувам и советите на лекарите упатуваат на тоа дека постои неопходност од подолго лекување и опоравување, заради што јас нема да сум во можност да ја обавувам функцијата министер за финансии и потпретседател на Владата на Република Македонија“, изјави во јуни лани Ставрески.

Во шесте месеци додека беше на министерската позиција како колега  според договорот од Пржино го имаше Кире Наумов од СДСМ во улога на дополнителен заменик-министер. Иако на почетокот и двајцата изјавија дека имаат коректен однос, коректноста кратко траеше. Следуваа месеци на меѓусебни конфликти, најмногу за задолжувањата кај домашните но и кај странските кредитори.

Ставрески важеше за личност од доверба на поранешениот премиер Никола Груевски, па затоа и веста за неговата оставка ја зачуди јавноста. Многумина неговата оставка ја поврзаа со ланскот земање на еврообврзницата од 450 милиони евра, која се случи веднаш по неговото заминување од функцијата, а која ја спроведе неговиот наследник, министерот Кирил Миноски. Дел пак коментираа дека влијание за неговата оставка имале опозициските бомби во кои можеше да се слушне како Ставрески не се согласува со голем дел од политиките што ги води актуелната владејачка гарнитура, што пак беше прокоментирано дека било и причина за нарушување на блискоста со Груевски.

А пред да ја поднесе оставката,повеќе од половина година, колку што и беше министер во 2016-та, Ставрески речиси и да не се појавуваше во јавноста. Но, до крајот на својот мандат тој јавно не се конфронтираше со неговата партија и остана доследен во спроведување на зацртаната економска политика и во ек на политичката криза.

„Кога во другите земји се зголемуваше невработеноста, во Република Македонија таа се намали. Извозот растеше и сѐ уште расте и добро е тоа што странските компании ја разбираат оваа ситуација“, изјави лани Ставрески.

Ставрески беше клучниот креатор на економските политики, со одлучувачки збор за тоа како и каде ќе се трошат буџетските пари. Како креатор на ланскиот Буџет, за 2016-та  најави економски раст од над 4 отсто и буџетски дефицит од 2,6 отсто. Но на крајот на 2016-та, проекциите се изјаловија, растот се преполови, а дефицитот се продлабочи. Тој лансираше неколку проекти, мерки и инвестиции. Дел од нив сеуште траат, дел доживеаја фијаско, дел од проектите беа оценети како позитивни, а дел како контроверзни.

Зоран Ставрески кој неговите поранешни колеги го опишуваат како интелегентен и понизен пред надредените, откако СДСМ ги објави  прислушувани разговори во кои тврди дека еден од соговорниците е Ставрески,  јавноста го виде во поинакво светло и со поинакви ставови за Владата и македонската економија. И токму тие прислушувани разговори ја разобличија розовата слика за раководењето со буџетот, состојбата со приходите, македонската економија, наредбите од премиерот Никола Груевски, а Ставрески, на некој начин ги собра симпатиите на дел од јавноста, онаа која не се согласува со начинот на кој се креира и развива македонската економија. И во измината 2016 –та година останува запаметена реченицата на Ставрески од прислушуваните разговори - „ Ние сме лудаци...трошиме за чоколади а немаме за леб“.

Т.С