Бобан Илиќ жали за смртта на малиот Алмир, но рече дека е невин

Добивај вести на Viber

Обвинетиот Бобан Илиќ, кој е обвинет за „тешко дело против безбедноста на луѓето и имотот во сообраќајот“, за смртта на четиригодишниот Алмир Алиу од Куманово, рече дека не се чувствува виновен на денешното судско рочиште каде беа дадени завршните зборови. 

Тој изрази жалење за смртта на малиот Алмир, но рече дека е невин.

Неговиот адвокат, Стеван Павлески побара ослободителна пресуда. Како што рече Павлески, неговиот клиент не го извршил делото со умисла. Тој се повика на невропсихијатриското и сообраќајно-техничкото вештачење и видео записот, нагласувајќи дека Илиќ бил вовлечен во конфликтна ситуација од која се обидел да излезе.

„Вештачењата се резултат на доказите, во вид на видео снимки, искази на сведоци, очевидци на настанот, тоа се супер докази. Врз основа на тие докази се изготвени вештачењата“ – изјави Павлески. 

Пресудата ќе се знае на 5 април.

Детето беше прегазено на 25 јуни 2016 година, по претходна банална расправија со таткото на момчето, во кумановскиот Здравствен Дом во Куманово. Четиригодишниот Алмир почина од здобиените повреди на 1 јули 2016 година.