Борисов и Захариева денеска во Македонија, на агендата Гоце Делчев, Илинден и откривање споменик
Објавено во: Македонија 01 Август, 2019
Бугарскиот премиер Бојко Борисов денеска ќе престојува во посета на Скопје и заедно со премиерот Зоран Заев ќе ја одбележат двегодишнината од договорот за добрососедство, пријателство и соработка. Ќе се чествуваат и настани и ликови од Илинденското востание, како и делото на револуционерниот деец Гоце Делчев.
Борисов и Заев ќе имаат средба на која ќе го разгледаат напредокот на соработката на билатерален и мултилатерален план, по што двајцата премиери ќе учествуваат на церемонијата на полагање цвеќе на гробот на Гоце Делчев во црквата „Св. Спас“ во Скопје.
Предвидено е Борисов во Скопје да се сретне и со шефот на државата, Стево Пендаровски. Потоа Борисов ќе замине во Дојран, каде што со македонскиот премиер Заев ќе го откријат споменикот на полковник Константин Каварналиев.
Станува збор за бугарски херој назначен постхумно за генерал кој во Втората балканска војна во 2013-та со помалубројна војска го извлекол бугарското население од обрачот на грчката армија и ја добил битката во која загинува.
Предвидено е со Борисов да допатува и Екатерина Захариева, министерката за надворешни работи на Бугарија.