БП, ШЕЛ, ТОТАЛ, ЕКСОН И ШЕВРОН ЗАРАБОТУВААТ ПО 2.600 ДОЛАРИ СЕКОЈА СЕКУНДА: Најновата анализа на Оксфам објавена во Давос

Добивај вести на Viber

За време на пандемијата, нов милијардер се појавуваше на секои 30 часа, а на секој нов милијардер, речиси милион луѓе оваа година би можеле да бидат турнати во сиромаштија, се вели во извештајот на невладината организација Оксфам, која се бори против сиромаштијата, насловен „Профитирање на болка“.

Во извештајот објавен на почетокот на Светскиот економски форум во Давос се вели дека 573 нови милијардери биле создадени во двете години од пандемијата, додека 263 милиони луѓе се очекува да паднат во сиромаштија поради зголемените цени на храната до крајот на годината. Додека еден милијардер се појавува на секои 30 часа, милион луѓе паѓаат во зона на сиромаштија на секои 33 часа.

„Богатството на најбогатите се зголеми за време на пандемијата Ковид 19 повеќе од претходните 23 години заедно. Вкупното богатство на светските милијардери е 13,9 отсто од БДП, што е трикратно зголемување во споредба со 2020 година“, се вели во извештајот.

„Богатството на милијардерите не е зголемено затоа што се попаметни или затоа што работат повеќе. Работниците работат повеќе, за помали плати и во полоши услови. Супер богатите го поставуваа системот со децении и сега ги користат придобивките. Тие собраа шокантна количина на светско богатство како резултат на приватизациите и монополите, задушувањето на регулативата и правата на работниците додека депонираа пари во даночните раеви. Сите со поддршка од „владата“, изјави Габриела Бушер, директорка на Oxfam International.

Богатството на тајкуните во енергетскиот и прехранбениот бизнис се зголеми за 453 милијарди долари во последните две години, а во овој период се појавија 62 нови милијардери во прехранбениот сектор.

Според Оксфам, само меѓу сопствениците на Cargill, една од најголемите прехранбени компании во светот, бројот на милијардери се зголемил од осум на 12 во овој краток период во кој цените на храната се зголемиле за повеќе од 30 отсто.

Според анализата на Оксфам, петте најголеми енергетски компании (БП, Шел, Тотал, Ексон и Шеврон) заработуваат по 2.600 долари секоја секунда.