Британскиот бизнис не поддржува излез на Велика Британија од ЕУ

Добивај вести на Viber

Велика Британија да остане членка на ЕУ, ова е желбата на мнозинството од британскиот бизнис и луѓето кои се вклучени во него, иако сметаат дека некои од овластувањата што сега му се префрлени на Брисел би требало да се вратат во надлежност на Парламентот во Лондон. Истражувањето што го направи Би-Би-Си за Британската трговска комора, покажува дека 64 отсто од учесниците во анкетата се изјасниле за останување во ЕУ, додека само 18 отсто од бизнисмените сметаат дека Велика Британија треба да ја напушти Унијата и да продолжи самостојно. Мнозинството од оние кои поддржуваат продолжување на членството во ЕУ, веруваат дека би требало да се „дотераат“ некои делови од спогодбите што ги има Велика Британија со Унијата. Најголемиот дел овие бизнисмени смета дека тоа треба да се направи, пред се, со прописите за вработувањето и за работните односи. На бизнисмените им пречат при работењето и сегашните европски прописи за здравство и за безбедност во работата, како и политиката на регионалниот развој во ЕУ.   Според британските бизнисмени, секое драстично менување на сегашниот статус на земјата кон ЕУ, ќе има силно влијание врз домашниот бизнис и кон економскиот просперитет.   Еден голем дел од анкетираните бизнисмени оценува дека референдумот што го најави премиерот Дејвид Камерон, за тоа дали Велика Британија и натаму треба да остане во ЕУ, ќе им наштети на инвестициите, додека помал дел од бизнисот се согласува со премиерот и неговиот план.   Во истражувањето учествуваа четири илјади британски бизнисмени во разни сектори.