Бучковски: Лудите години на владеење на Груевски се виновни за се

Добивај вести на Viber

Поранешниот македонски премиер и ексминистер за одбрана Владо Бучковски го обвини бившиот претседател на Владата, Никола Груевски, како највиновен за тоа што дел од граѓаните не сакаат да ја прифатат Спогодбата од Преспа и им се чини дека референдумот е „мачка во вреќа“.

„Болен е компромисот. Тоа е таа жртва, според мене, за квалитет. Македонија прави голема жртва. Ова е уникатен пример. Но, тоа беше нужно поради сите оние, според мене, луди десет години на владеењето на Никола Груевски, кога самите го загрозивме идентитетот“, изјави Бучковски во интервју за Бугарска национална телевизија (БНТ). 

ЕКс-премиерот додава дека Груевски со антиквизацијата, со барањето на корените на нашите предци во антиката, го разгорел национализмот во Грција и Македонија ја доведол во ситуација да ја изгуби поддршката од меѓународната заедница.

„Македонија е мала држава. Научи нешто во последната година. Тука јавно повторно да се заблагодарам за сета помош што ја даде бугарската Влада, пред сè, премиерот Бојко Борисов, и вашиот министер за надворешни работи Екатерина Захариева. Реално, за време на бугарското претседателство со ЕУ ние го направивме најголемиот исчекор, го затворивме ова прашање со Грција, но од друга страна ги отворивме перспективите за стабилизација на овој дел од Европа. Значи, Балканот не може да биде стабилен без стабилна Македонија. Затоа, јас сум убеден дека граѓаните на Република Македонија се свесни за жртвата што ја прават, но од друга страна нема алтернатива за Македонија. Ние мораме да бидеме дел од НАТО и од Европска унија за да престанат сите калкулации со нашата иднина“, заклучи Бучковски.