Cекој четврти Германец заработува едвај минимална плата

Добивај вести на Viber

Да работие во Германија не значи дека и добро ќе заработите. Според истражувањето на Институтот за истражување на пазарот на труд, кој е дел од Сојузната германска агенција за вработување, во тој поглед, Германија е падната зад Кипар, Бугарија, Велика Британија и Полска, информира Дојче Веле. Според тоа, секој четврти работник или повеќе од 7 милиони граѓани во Германија заработуваат под износот кој може да се смета за минимален приход. Тој минимален приход се одредува со две третини од статистичката средина меѓу половина лица кои заработуваат повеќе и половина вработени кои земаат помала плата. Во апсолутен износ би можело да изгледа дека во Германија и натаму добро се заработува, бидејќи границата за минимален приход е 9,54 евра од работен час. Но, тоа е бруто износ од кој се одбиваат давачкките за социјално и здравствено осигурување, данокот и другите одбитоци. Подобро од Германија се заработува во Австрија, каде прагот е 9,76 евра, како и во скандинавските земји: Финска (11 евра), Шведска (12,13 евра) и Данска (15,80 евра). Една од главните причини за лошата положба на Германија во ова истражување е што во неа има се помалку постојано вработени лица и тоа со полно работно време. Како што истакнува раководителот на истражувањето Томас Рајн, тој тренд почнал уште во 90-те години на минатиот век, а со оглед на тоа што дури сега се обработени податоците за 2010 година, многу е веројатно состојбата во меѓувреме да станала уште полоша. Во делот на вработените на неопределено време, значи не сметајќи ги хонорарците и вработените кои немаат полно работно време, состојбата во Германија е нешто подобра, но и натаму значително полоша од просекот во ЕУ. Рајн нагласува дека затоа се’ помалку вработени се опфатени со колективниот договор меѓу работодавачите и синдикатот за висината на платата. Во 1996 година тој на западот од Германија опфаќал 70 проценти од вработените, а во 2012 година предностите од тој колективен договор ги чувствувале само 53 проценти од вработените.