Целосна раководна промена во МЕПСО - Ова се новите членови на одборите
Објавено во: Економија 10 Август, 2017
Со одлука на Владата дојде и до целосна промена на раководството на Македонскиот електропреносен систем, па така освен со изборот на новиот генерален директор Сашо Василевски, избрани се и целосно нови состави на Управниот и Надзорниот одбор.
Во Управниот одбор на МЕПСО АД Скопје нови членови се Борко Алексоски кој ќе ја врши функцијата директор за управување со електропреносниот систем, потоа Симон Шутиноски, назначен задиректор за управување со пазарот на електрична енергија, Ненад Крстевски е нов за директор за правни и општи работи во дирекција, Сашо Стефановски е назначен за директор за пренос на електрична енергија, а Томи Божиновски за директор за информациони технологии и телекомуникации во дирекција.
Новиот Надзорен одбор на МЕПСО ќе го сочинуваат Ева Шуклева, која е и претседател на ова тело, а покрај неа членови се Даме Коруноски, Николче Ацевски, Назиф Буши, Снежана Чундева и Трајче Черепналковски.
Разрешување од Управниот одбор на МЕПСО добија Кирил Ачкоски кој беше директор за управување со пазарот на електрична енергија, потоа Ацо Ристоски задолжен за преносната мрежа. Исто така од позицијата заменик генерален директор и член на управен одбор е разрешена и Елизабета Гиевска, а од Управниот одбор е тргнат и сега поранешниот генерален директор Ненад Јовановски. Роберт Ордановски е разрешен од функцијата директор за информациони технологии и телекомуникации во МЕПСО.
Промените во Управниот и Надзорниот одбор на МЕПСО како и новиот генерален директор се утврдени и запишани во Централниот регистар на Република Македонија.