Централен регистар потврди дека Јосифовски „шпиунирал“
Објавено во: Македонија 03 Септември, 2019
Централниот регистар на Република Северна Македонија потврдува дека е извршен упад во компјутерски систем, по објавената вест дека поранешниот пратеник Љубомир Јосифовски е приведен во полициската станица „Беко“ во Скопје откако се обидел да превземе податоци за фирми пред да го забележат ИТ-администраторите и да го пријават во МВР.
„Централниот регистар на Република Северна Македонија веднаш по упадот поднесе пријава до Министерството за Внатрешни Работи – Сектор за компјутерски криминал и дигитална форензика. Упадот е извршен со злоупотреба на безбедноста и со надминување на безбедносни пречки од страна на Друштвото за обработка на податоци, хостирање и слични дејности ИНФОГРУП ДОО Скопје. На тој начин ова правно лице неовластено обезбедувало податоци од регистри што ги води Централниот регистар“, соопштија од Централен регистар.
Од таму нагласуваат дека воопшто не се нарушени состојбата и интегритетот на податоците во сите регистри што ги води Централниот регистар и дека сите системи и услуги на Централниот регистар непречено функционираат и се достапни за сите корисници, а податоците во регистрите се соодветно заштитени.