Централен регистар: Победи фирма која имаше многу конкуренти, возилата се стари 20 години
Објавено во: Економија 29 Јули, 2018
Централен регистар информира дека по законски распишаниот оглас во мај за набавка на 10 лесни и 1 товарно моторно возило победила фирмата која имала најдобра понуда во ситуација кога имало повеќе конкуренти, а истовремено потребата била да се заменат автомобили стари околу 20 години.
За потребите на институцијата, а согласно законот за јавни набавки, била закажана електронска аукција за операторите кои ги задоволиле критериумите специфицирани во техничката спецификација.
,,По спроведената аукција со негативно електронско наддавање преку ЕСЈН, за најповолна ја избра понудата на споменатиот економски оператор.На распишаниот тендер конкурираа повеќе економски оператори. За оние кои ги задоволија критериумите, уредно и законски беше закажана е-аукција. За спроведување на тендерската постапка, Централен регистар формираше и соодветна комисија, согласно сите законски прописи за јавни набавки”, се вели во соопштението.
„Нов тендер за набавка на возила за потребите на државните институции доби фирма донатор на СДСМ. Имено, се работи за кумановската фирма Делукс – Ауто која го доби тендерот и од Централниот регистер на Македонија во вредност од на 8.3 милиони денари за набавка 11 моторни возила“, реагираше денеска Владимир Нелоски, член на ИК на ВМРО-ДПМНЕ.
„Лани без тендер, во четири очи Делукс Ауто Куманово направи зделка тешка еден милион евра со Министерството за внатрешни работи и Оливер Спасовски за набавка на 45 шкоди“, прецизира Нелоски.