Чулев побара за 1 Мај да нема карантин

Добивај вести на Viber

Наќе Чулев, министерот за внатрешни работи, на денешната седница на Координативниот штаб во владата побара да нема карантин за празничниот 1 Мај, односно истиот ден полицискиот час да важи од 19.00 часот. Според техничкиот министер, за претстојниот викенд треба да важи истата мерка на ограничување на движењето како и изминатиот, односно да важи од сабота од 15.00 часот до понеделник до 05.00 часот.

„Во таа насока, а во пресрет на продолжениот викенд за 1 мај, сметам дека владата треба да донесе одлука која ќе биде идентична на изминатиот викенд. Секое ограничување кое ќе биде построго и поригирозно негативно ќе се одрази на граѓаните. Граѓаните се одговорни, совесни и генерално ги почитуваат мерките за ограничување на движењето. Тие се свесни за ризикот кој го носи заразата од Covid 19 и ги применуваат мерките за заштита на своето здравје“, објави Чулев во дел од својот статус на Фејсбук.

Тој и понатаму стои на ставот дека шумите и планините треба да останат отворени во периодот кога е дозволено движењето за граѓаните, но тие да се користат за рекреирање, а не за групирање на граѓаните.

- Апелирам до граѓаните да ги почитуваат одлуките кои се однесуваат на задолжителна употреба на соодветна заштитна опрема, а Министерството за внатрешни работи, односно полициските службеници и понатаму ќе стојат во првите редови во заштита на животот и здравјето на сите нас, вели Чулев.