Чулев: Во Штип на Роми им ги држел во залог личните карти за да гласаат за СДСМ

Добивај вести на Viber

Наќе Чулев, техничкиот министер за внатрешни работи, информира дека од страна на Отсекот за економски криминал при Секторот за внатрешни работи Штип во текот на вчерашниот ден се расчистувал случај со поткуп при избори и гласање, при што е пријавено до основното јавно обвинителство од каде што се чекаат насоки за понатамошно дејствување.

- Имено, по добиени оперативни информации дека лицето Д. А. од Штип поседува патни исправи и лични карти од повеќе НН лица од ромска националност кои биле држени како залог за настанат долг во неговата прехранбена продавница, а кој долг наводно би им бил подмирен доколку истите на денот на изборите гласаат за политичката партија СДСМ, од страна на ОЕК при СВР Штип од Судија на претходна постапка од Основен суд Штип побарана и добиена е наредба за претрес на дом и други простории кај конкретното лице со цел обезбедување на материјални докази и целосно документирање на настанот. При извршениот претрес во прехранбената продавница на лицето биле пронајдени 4 тетратки во А4 формат во кои имало список со имиња, 69 биометриски лични карти, 18 биометриски патни исправи, 18 стари патни исправи, 6 стари лични карти, 1 дозвола за престој и 1 здравствена легитимација, за кои постои основано сомневање дека се предмет на Кривично дело ,,Поткуп при избори и гласање“ од чл.162 од КЗ. Пронајдените предмети со потврда за привремено одземени предмети се одземени од лицето Д. А., а во просториите на СВР Штип со конкретното лице извршен е разговор во однос на околностите поврзани со пронајдените предмети, рече Чулев.

Техничкиот министер вели дека МВР и понатаму ќе ги презема сите мерки и активности за спречување на изборен поткуп и влијание врз гласачите.

-  Апелирам до граѓаните да ја пријават секоја активности со која се крши или попречува нивното избирачко право, порачува Чулев.