ЦУК апелира граѓаните да не се движат на местото под карпата на Матка

Добивај вести на Viber

Од Центарот за управување со кризи велат дека состојбата со опасната карпа на Матка на долг рок е неодржлива. 

Превентивно апелираат граѓаните да не се движат на местото под карпата на брегот на десната страна на речното, односно езерското корито. Зоната на ризик ќе биде обележана.

На состанокот беше разгледана состојбата со опасната карпа и од стручните лица е констатирано дека истата има гранична стабилност и дека е потребно преземање мерки и активности за превенција и намалување на опасноста од карпата. Исто така, се идентификувани две групи на ризици, прво примарна штета – од евентуално паѓање, односно одрон на карпата и секундарна штета – излевање и ударен бран од водата. 

На работниот состанок се донесени заклучоци за обврските што е потребно да се преземат за превенција. Тоа се заклучоци во насока на генерални чекори синхронизирани од повеќе институции во државата, а поттикнати и глобално координирани од ЦУК: прво – проектна програма за дејствување; второ – изработка на техничка документација, проект за санација на проблемот и на крајот, како трето – јавна набавка за избор на изведувач на работите за санација на опасната карпа.
Во насока за превенција ќе бидат донесени мерки од надлежните за ограничувње на движењето во зоната на опасност што не би го попречило работењето на фирмите во околината и движењето на туристите надвор од зоната на ризик.

ЦУК официјално ќе иницира изготвување на првиот координиран чекор на општествено дејство – изготвување на проектна програма на дејствување.