ДАЛИ ИМА УСЛОВИ ЗА ИЗБОРИ ВО ЈУНИ - министерот не беше прецизен, кажа дека пред нас е мирен период
Објавено во: Македонија 12 Мај, 2020
На прашањето дали смета дека има услови изборите да се одржат во јуни, министерот за здравство Венко Филипче не беше прецизен, нагласувајќи дека пред нас ќе имаме мирен период, а ги спомена и ризиците.
„Овие мерки кои ги носиме, истите параметри кои се анализираат цело време, и во таа насока се и овие предвидувања. Наш став и начин на работа е сите мерки да бидат врз основа на бројките. Пред нас е еден мирен период, сега се видливи резултатите од рестрикциите, и според дискусијата и предвидувањата, сметаме дека пред нас е мирен период, во кој може да се изменаџира бројот на пациенти од страна на здравствениот систем. Има мали варијации изминатите денови, но добро е што најголем дел од дијагностицирани пациенти се со точно утврдени настани, а тие се погребот во Тетово и мал семеен настан во Скопје. Состојбата може да ја влошат отворањето на границите, патувањата, влезот на странци, наши граѓани во странство и враќање, враќање назад во училиштата, како и сезонски грип кој се јавува во есенските месеци. Такви се предвидувањата, и сега врз основа на тие анализи го препорачуваме ова олабавување на мерките“, рече Филипче.
Повторно прашан дали смета дека има услови за изборите да се одржат во јуни, Филипче рече дека ги кажал аргуиментите зошто сметаме дека периодот пред нас ќе биде мирен, а ги кажал и ризиците, врз основа на кои беа воведени мерките.