Димитров: Шпанскиот амбасадор утре ќе го даде инструментот во Вашингтон

Добивај вести на Viber

Никола Димитров, министерот за надворешни работи, на денешната заедничка прес-конференција со останатите членови од Владата рече дека шпанскиот амбасадор утре ќе го депонира инструментот од ратификацијата на пристапниот протокол на Македонија во НАТО по што земјата и формално ќе стане членка на Алијансата.

- Ветувањето на првиот состав на Собранието го исполнивме. Ова се случи откако решивме судбината да ја превземеме во наши раце. Во исклучително тешки и вонредни услови заврши ратификацијата на пристапниот протокол во шпанскиот Сенат. Утре шпанскиот амбасадор ќе го предаде оригиналот како инструмент на ратификацијата во Вашингтон, потоа Стејт Департментот ќе ги извести сите сојузници и седиштето на НАТО. Ќе добиеме писмо од генералниот секретар (Јенс) Столтенберг дека е време ние да го депонираме нашиот инструмент за ратификација. И кога ние ќе го депонираме нашиот инструмент, ние формално ќе станеме членка на Алијансата, рече Димитров.

Радмила Шекеринска, министерката за одбрана, рече дека веќе на Македонија може да се гледа како на официјална земја-членка на НАТО.

- Станавме 30-та членка на НАТО. Некои од одлуките беа ѓаволски тешки, но ги носевме со длабока верба дека се исправни.  Ниту една политичка идеја не преживеала толку долго колку идејата за НАТО-членство. Да си го честитаме членството во најголемата воено-политичка алијанса и честитки за трпението.  Токму во оваа мака се гледа на што можеме да се потпреме, од кого можеме да очекуваме мудрост и решение. Нека овој успех ни даде сила, оптимизам и истрајност, наведе Шекеринска на брифингот.

Вујар Османи, вицепремиерот за евроинтеграции, додаде дека набрзо следува за краток период и добивање датум за преговори на Македонија со ЕУ.

- Овој специфичен период не ни допушта да го славиме овој заеднички успех. Северна Македонија влегува во нова фаза на сопствениот напредок. За неполна недела закажан е Советот за општи работи, наречен ГАК, каде на маса се очекува да бидат предлог-заклучоците за отпочнување на преговори со Северна Македонија, а веројатно и со Албанија. Сите сигнали ни говорат дека земјите-членки немаат никакви забелешки за ваквата одлука, појасни Османи.