Дирекцијата им ги зголеми паушалите за одржување на инфраструктурата на странските инвеститори
Објавено во: Економија 25 Февруари, 2020
Дирекцијата за технолошко-индустриските развојни зони со новите тарифници за 2020 им ги ги зголеми паушалите за одржување на инфраструктурата на странските инвеститори во внатрешноста на земјата и ги израмни цените со оние во Скопје1 и Скопје 2.
Сега месечно по 5 денари од метар квадратен ќе се наплаќа во сите преостанати зони за закупен простор. Според стариот тарифник донесен во средината на 2018 паушалите за Штип, Прилеп, Гевгелија, Струмица и Струга беа 3,1 денари од метар квадратен како најфункционални по двете скопски. Во Кичево, Радовиш и Виница се наплаќаше по само 2 денари, а во Берово и Делчево цената беше дури 1 денар од метар квадратен.
Услугата од 5 денари по метар квадратен се дели подеднакво на пет дела и по 1 денар се наплаќа за одржување на површината и границата, одржувањето на осветлувањето, 24-часовното физичко обезбедување, 24-часовната контрола на влез и излез и обезбедување на услови за работа на царинската служба.
Остануваат исти цените на останатите услуги како што се паркинг тарифите за терминали, мерењата на стоката,м закупнината на магацинските простори, поставувањето банкомат и друго како во претходниот тарифник.
Дирекцијата е задолжена за одржување на 13 локации каде што се основани 15-тина технолошко-индустриски развојни зони. Од основаните зони, оперативно подготвени и најфункционални се ТИРЗ Скопје 1 и 2, како и ТИРЗ Штип, а тука се и зоните во Кичево, Прилеп, Струга и Струмица. ТИРЗ Тетово е исто така оперативна и за неа е склучен Договор за јавно-приватно партнерство.
Со годишен буџет одф неколку милиони евра дирекцијата ги реализира проектите за инфраструктурно уредување на зоните заради обезбедување услови за влез на нови инвеститори. Покрај внатрешната инфраструктура наТИРЗ Скопје 1 и 2, тука е и сообраќајно-транспортното поврзување.
А.К.