Договорот за името во фокусот на западните медиуми - еве што пишуваат
Објавено во: Македонија 18 Јуни, 2018
Потпишувањето на договорот меѓу Македонија и Грција за ставање крај на спорот за името втор ден е во центарот на вниманието на светските медиуми.
„Индепендент“ пишува дека церемонијата во Мала Преспа се одржа откако грчкиот премиер Алексис Ципрас го преживеа гласањето за недоверба и дека следува процесот на одобрување на договорот во парламентите на двете земји.
Британски „Гардијан“ наведува дека со потпишувањето на договорот, двајцата премиери ставиле крај на еден од најгорливите балкански спорови некогаш. Наведуваат и дека ова е историски ден за регионот кој долго време е потопен во политика на непријателство.
„Телеграф“ коментира дека Зоран Заев и Ципрас не отстапиле пред силните непријателски реакции во своите земји и дека Скопје се надева на датум за почеток на преговорите кон ЕУ на престојниот самит во Брисел, како и покана за влез во НАТО Алијансата во јули.
„Њујорк Тајмс“ и „Фајненшл Тајмс“ се осврнаа на значењето на овој договор за Македонија со кој се отвораат вратите кон влез во Европската унија и НАТО. Пишуваат и за жестоките отпори на незадоволните граѓани и протестите кои ги имаше и во Скопје и Атина.