Две компании заинтересирани за изградба на гасната мрежа

Добивај вести на Viber

Две пријави за учество пристигнале до Министерството за економија за јавно-приватно партнерство за изградба, одржување и управување на дистрибутивната мрежа за природен гас во Македонија по јавниот повик што претходно беше објавен за инвестиција од 300 милиони евра за гасификација на населените места низ земјата. 

Министерството не ги објавува имињата на заинтересираните оператори кои првично ги задоволуваат критериумите, бидејќи постапката е во тек, велат од таму, бидејќи по завршувањето на прибирање на понудите на 10 август, до конечниот избор на компанијата следат други рокови.

„Следи фаза на евалуација на пријави за учество, односно евалуација на нивната економско- финансиска способност, како и техничка способност во согласност со критериумите кои беа наведени во тендерската документација. По утврдувањето на способноста на компаниите, истите ќе бидат поканети да учествуваат на технички дијалог“, тврдат од министерството.

Владата во декември 2019 година донесе одлука за започнување на постапка за доделување на договор на приватен партнер кој ќе го изгради и потоа ќе наплаќа од дистрибутивниот систем на природен гас во земјата, додека паралелно државниот НЕР ги гради магистралните гасоводи и интерконективните приклучоци. 

Компаниите кои би аплицирале на јавниот повик треба да имаат најмалку 150 милиони евра годишен приход во последните три години а изборот треба да се направи со конкурентен дијалог. Инвеститорот за четири години треба да изгради најмалку 50 отсто од мрежата во градските општини и најмалку 20 отсто во руралните општини. Надлежните уште во февруари тврдеа дека интересот кај потенцијалните приватни партнери е огромен.

Оној што ќе го добие 35-годишниот договор ќе има право да менаџира и да остварува приход од системот со обезбедување на загревање на јавните установи, како и на комерцијалниот сектор и домаќинствата. Во најраната фаза ќе треба да ги гасифицира Аеродром, Бутел, Гази Баба, Ѓорче Петров, Карпош, Кисела Вода, Центар, Чаир, Градско, Демир Капија, Кавадарци, Крива Паланка, Куманово, Неготино, Прилеп, Свети Николе, Штип, Битола, Гостивар, Тетово, Кратово и повеќе рурални средини во непосредна близина. 

Договорот ќе го добие оној кој ќе понуди најмала висината на надоместок за приклучок кај крајните корисници, а критериум ќе биде и висина на надоместок за концесија и времетраењето на изградбата. Според владината одлука, приватниот партнер ќе плаќа за договорот доделен од државата така што ќе издвојува однапред предвиден процент од годишниот приход.