Еден човек контролира колку се веродостојни енергетските сертификати на зградите

Добивај вести на Viber

Само еден човек во 2019-та ќе контролира колку се веродостојни издадените сертификати за енергетската ефикасност на зградите по консултации со енергетските контролори, лиценцираните фирми и здруженијата на инжинери и архитекти. 

Ова е предвидено во објавениот план за работа на Агенцијата за енергетика за оваа година, а самата институција во истиот бара нови вработувања и обуки на кадрите бидејќи не може ефикасно да го постигне она за што е надлежна. 

Институцијата која поттикнува мерки за енергетската ефикасност и работи на услови за зголемено користење на обновливи извори на енергија во 2019-та ќе работи со буџет од околу 12 милиони денари, од кои половина ќе одат за плати на 15-тина вработени. Од таму бараат од министерствата да им одобрат вработување на потребни ИТ-техничар, електроинженер и машински инженер. Бараат вработување на барем едно лице.

- Само така екипиран и обучен кадар ќе може ефикасно да учествува во работните групи и комисии кои ќе предлагаат иницијативи за измени на законските прописи во склад со законодавстото на Европската унија, во спроведување на локални и регионални проекти од областа на енергетската ефикасност и обновливите извори на енергија, изработка на национални извештаи за остварените заштеди на енергија преку спроведување на мерки за енергетска ефикасност како и степенот на искористување на обновливите извори на енергија, извршување на надзор и контрола на квалитеот на извршените енергетски контроли и издадени сертификати за енергетски карактеристики на згради и други активности кои значат поддршка на Владата на Република Македонија во спроведување на енергетската политика, се вели во барањето на агенцијата.

Покрај сертификати за зградите, еден човек ќе ги контролира програмите на општините за енергетска ефикасност, двајца вработени ќе работат извештаи за заштеда на енергија, а двајца ќе ја следат потрошувачката на јавниот сектор, додека по уште двајца ќе издаваат потврди за постројки за обновливи извори на енергија и ќе го следат потенцијалот на ветерот. 

Во средината на 2017 година, покрај директорот, во Агенцијата за енергетика 10 лица биле редовно вработени и тоа: 1 политиколог, 2 дипломирани правника, 3 економисти , 1 електро инжинер, 1 машински инжинер, 1 шумарски инжинер и 1 лице со средно електро-машинско училиште. 

- Агенцијата редовно поднесува развојни стартешки планови односно годишни програми за работа но поради повеќе годишни буџетски рестрикции истетите не може да ги оствари во целост. Истото се рефлектира и можноста за вработување на кадри кои се потребни на Агенцијатаод ИТ, машинската и електро струка - се додава во планот.

Во дел од своето работење ова тело се потпира и на меѓународни и домашни донации.

A.K.