Една година од Преспанскиот договор

Добивај вести на Viber

Денеска се одбележува точно една година од потпишувањето на Преспанскиот договор во Нивици помеѓу тогашните министри за надворешни работи на Македонија и Грција - Никола Димитров и Никос Коѕијас,.

Со оваа спогодба се стави крај на речиси тридеценискиот спор меѓу Скопје и Атина околу името, а во меѓувреме Коѕијас си поднесе оставка како шеф на грчката дипломатија.

Со спроведувањето на овој документ се одблокираа интегративните процеси на земјава во НАТО и Европската унија, а Македонија согласно договореното се преименува во „Република Северна Македонија“, државјанството остана македонско/државјанин на Република Северна Македонија, а јазикот македонски.

Во земјава се спроведоа уставни измени, а согласно Договорот Грција прва го ратификува Протоколот за членство на Северна Македонија во НАТО, што досега го сторија 17 земји-членки и се очекува до крајот на годинава или на почетокот на следната и официјално земјава да стане дел од Алијансата. За преговорите со ЕУ очекувањата беа дека ќе добиеме зелено светло овој месец, но по најавата дека германскиот Бундестаг за последниот извештај на ЕК ќе расправа во септември, сега очекувањата за датум се поместија за наесен.

Договорот има голема поддршка од меѓународната заедница, која го оценува како своевиден пример за решавање спорови, во регионот, но и во светски рамки, а поради него Северна Македонија во последниот извештај на Европската комисија беше наречена светол пример во регионот.