ЕК продолжува да бара решение за визите за турските граѓани

Добивај вести на Viber

Европската комисија продолжува да бара решение за случајот за укинувањето на визите за турските граѓани, стана јасно за време на традиционалниот брифинг во Брисел. Олеснување на визниот режим беше дел од договорот меѓу ЕУ и Турција за ограничување на бегалскиот притисок.

Брисел сепак постави услов Турција да ги исполни сите потребни услови за укинување на визите. Во оваа фаза земјата не исполнила 7 од вкупно 67 барања, a едно од нив е барањето на ЕУ за промена во антитерористичкиот закон, потврди портпаролот на ЕК Маргаритис Схинас. Во декември ќе биде објавен новиот извештај на Комисијата за напредокот на Турција на нејзиниот пат кон членство во ЕУ.

Схинас беше категоричен дека во ЕК не се откажале да го направат успешен договорот меѓу ЕУ и Турција за бегалците и на случајот работат комесарот за миграцијата Димитрис Аврамопулос и Франс Тимерманс, одговорен за владеењето на правото во ЕУ.

Не сите контакти помеѓу европските и турските власти, вклучително и на ниво лидери, стануваат јавно познати, додаде тој и анонсира дека следната недела министерот за европски прашања на Турција ќе биде во Брисел.

Во четвртокот пратениците во Европскиот парламент гласаа за замрзнување на преговорите за членство на Турција во ЕУ. Тие се мотивирани по ова барање со кршењето на човековите права, што се случува во последните месеци во земјата по обидот за преврат против турскиот претседател.

Во одговор на тоа Реџеп Таип Ердоган предупреди дека ќе ги отвори границите на земјата и ќе овозможи слободно движење на имигрантите кон ЕУ. Во моментот на турска територија има околу 3 милиони бегалци.

Маргаритис Схинас посочи дека Необврзувачката резолуција на ЕП треба да биде разгледана само како „дел од сложувалката“ во односите меѓу ЕУ и Турција. Тој потсети дека одлуките во ЕУ не се донесуваат самостојно од една институција.

За време на брифингот Схинас коментира дека во ЕК се запознаени со она што се случи во кампот крај Харманли Бугарија минатата ноќ. Портпаролот на Комисијата додаде дека постојат начини за враќање на мигрантите, кои не сакаат да се вратат во своите родни места и додаде дека ЕК може да помогне со постапката.