Економската независност на Гренланд од Данска ќе остане само пуста желба

Добивај вести на Viber

Гренланд тешко може да се потпре исклучиво на природните богатства во остварувањето на економска независност од Данска, што е желба на многу Инуити кои живеат на островот. Панелот од 13 научници, кој состави извештај, заклучи дека рудата и нафтата можат да помогнат во развојот на полуавтономниот Гренланд, но не и да стави крај на економската зависност од Данска. Многу жители на Гренланд сакаат потполна автономија и се надеваат дека минералните богатства би можеле да ги надоместат субвенциите од Данска, кои сега покриваат околу две третини од тамошната економија, додека останатото доаѓа од риболовот и туризмот. Околу 57.000 жители на Гренланд главно живеат на западниот брег во помали градови или одалечени населби во кои економијата се врти кон риболовот и туризмот. Премиерката Алека Хамонд, чија што влада од левиот центар дојде на власт во 2013 година, рече дека очекува Гренланд да биде независен за нејзиниот живот. Во извештајот на 13-члениот панел се наведува, меѓутоа, дека Гренланд ќе продолжи да се потпира на финансиската помош на Данска која минатата година изнесуваше околу 600 милиони долари. Гренланд, минатата година, ја укина 25-годишната забрана за ископување на ураниум, имајќи предвид дека тој често се наоѓа заедно со други ретки метали кои се употребуваат за смартфони и оружје. Во еден рудник на југот од островот би можела да биде најголемата резерва на ретки метали надвор од Кина, која во моментов допринесува за 90 отсто во нивното производство во светот.   А.А.