Екс градоначалникот Захариев обвини за политички прогон
Објавено во: Македонија 03 Април, 2018
Поранешниот градоначалник на Штип Илчо Захариев по вчерашната пријава за злоупотреба на службена положба и овластувања и несовесно постапување во службата, истакна дека кривичната ја добил како резултат на политички прогон спроведен преку СВР Штип.
– За просторот, каде беа објектите на ЈП „Стипион“ донесен е Детален урбанистички план, усвоен од Советот на општина Штип. Продажбата на базенот и останатите парцели се со одлука на Советот. ЈП „Стипион“ со одлука на Советот доби нови простории во Новакова чешма, поранешни магацини на АРМ. Целата постапка за продажба и отстранување на објектите, кои беа руинирани е спроведена законски. Општината инкасираше околу 600.000 евра од продажбата на земјиштето за Спортско рекреативниот центар „Брегалница“, нагласува Захариев.
СВР Штип покрај Захариев, за истите дела поднесе кривична пријава и против екс директорот на ЈП „Стипион“. Екс штипскиот градоначалник очекува оваа кривична пријава да биде повлечена.