Електродистрибуција ги извести институциите кои компаниите треба да се вратат на отворен пазар

Добивај вести на Viber

Со цел исполнување на обврските на Операторот на дистрибутивниот систем за спречување на злоупотреби и манипулации на пазарот на електрична енергија, Електродистрибуција достави информација до засегнатите државни институции за тоа кои бизнис корисници не ги исполнуваат условите да се снабдуваат од Универзалниот снабдувач на регулиран пазар. 

Од компанијата додават дека ова е согласно Одлуката на Владата на РСМ за преземање на мерки во услови на постоење на кризна состојба во снабдувањето со електрична енергија. 

- Информацијата беше доставена до Владата, Министерството за економија и Регулаторната комисија за енергетика. Освен институциите, Електродистрибуција активно и поединечно ги известува гореспоменатите корисници дека нема повеќе да се снабдуваат од ЕВН Хоме, Универзалниот снабдувач за домаќинства и мали бизнис потрошувачи и дека е потребно да склучат договори за снабдување со електрична енергија со снабдувачите на отворениот пазар - наведуваат од компанијата.

За потсетување изминатиов период беше објавено дека бизнисмени и градоначалници го изиграа Законот за енергетика и од слободниот пазар се префрлија на регулираниот. Како што беше најавено, ако тоа сами не го направат, Универзалниот снабдувач сам ќе ги исфрли од мрежата. 

Според надлежните станува збор за стотици компании од приватниот сектор, но и општини и јавни комунални претпријатија. Неофицијалните информации се дека во оваа шема се вмешани околу 2.500 фирми од речиси сите сектори.

Дали и која ќе биде санкцијата за овие деловни субјекти допрва ќе се знае. Надлежните уверуваат дека ваквата злоупотреба и користењето на струјата на домаќинствата од страна на дел од приватните и јавните компании нема драстично да влијае врз цената на електричната енергија.