Ердоган бара прекин на протестите, во Истанбул се собираат демонстранти
Објавено во: Балкан 07 Јуни, 2013
Протестите во Турција продолжуваат и по десетина дена од нивниот почеток. Повторно илјадници демонстранти се собраа на плоштадот Таксим во Истанбул игнорирајќи го повикот на турскот премиер Реџеп Таип Ердоган да се стави крај на протестите против неговото управување.
Со мирен протест насобраните граѓани се собрале да слушаат музика на турските национални инструменти и песни, а како што јавуваат светските медиуми засега атмосферата засега е мирна.
По враќањето од посетата на Северна Африка, Ердоган ги повика демонстрантите да ги запрат протестите.
„Ние сме против насилство, вандализам и дејствија кои им се закануваат на другите во име на слободите. Ние сме целосно отворени за оние кои доаѓаат со демократски барања“, нагласи Ердоган во својот говор во Истанбул.
Претходно денеска евро-комесарот за проширување, Штефан Филе кој беше на конференција во Истанбул, го предупреди Ердоган дека употребата на сила против демонстрантите не е соодветно за демократијата. Ердоган врати дека тој е отворен за сите демократски барања, но е против тероризам, насилство и вандализам.