Ердоган на 9 мај во Македонија?

Добивај вести на Viber

Турскиот претседател Реџеп Таип Ердоган во својата предизборна програма би можел да најде простор на 9 мај да ја посети Македонија, велат извори од владиниот коалиционен партнер Движењето на Турците во Македонија.

Ердоган уште во февруари преку контактите со македонски државни функционери истакнуваше дека во мај на агендата му е посета на Македонија, но во меѓувреме се распишани предвремени парламентарни и претседателски избори во Турција за 24 јуни.

Инаку, од ТХП велат дека тимови на Ердоган подготвуваат и инвестициски договори и договори за трговска размена и соработка, кои би можеле да се потпишат во Македонија. 

Министерот без ресор за странски инвестиции, Аднан Ќахил, кој доаѓа од оваа партија е близок пријател со влијателниот претседател на Турција.

Во меѓувреме, Претседателот на Партијата на правдата и развојот (АКР) во Анкара пред своите соработници откри дека еден политичкиот митинг ќе се одржи во спортска сала во Европа. Се верува дека тоа ќе биде некаде на Балканот, откако тој влезе во жестоки дуели минатата година со европските челници при обидите на неговата партија да одржи собири во европските градови каде има голема турска дијаспора, во рамките на кампањата за референдумот за проширување на претседателските избори. Германија, Холандија и Австрија ги забранија овие настани и ги оневозможија собирите со учество на турски министри.

„Во мај ќе го одржиме својот прв состанок во спортска сала во Европа, ако даде Господ. Сите подготовки се готови. Засега не сакам да кажам во која држава тоа ќе се случи“, рече турскиот претседател.

А.К.