ЕУ го одврзе ќесето за Африка - колку ќе потроши?
Објавено во: Економија, Свет 18 Октомври, 2016
Европската унија ќе потроши до крајот на годината речиси половина милијарда евра во Африка.
Ова се пари за пет африкански држави, во рамките на напорите за справување со миграциската криза. Ова го соопшти првиот дипломат на Унијата, Федерика Могерини во Брисел денеска.
24 проекти со вкупна вредност од 425 милиони евра ќе бидат започнати до крајот на годината во Нигер, Нигерија, Мали, Сенегал и Етиопија, со кои ќе се организираат активности за борба против трговијата со луѓе, ќе се стимулира вработувањето, ќе се подобруваат условите за бегалците и за локалното население.
Програмите се дел од Европската агенда за миграцијата, кој ЕУ го усвои во почетокот на летото за работа во пет приоритетни држави во Африка. Парите ќе дојдат од создадениот Фондот за Африка, чиј буџет за следната година Европската комисија бара да се удвои.
„Нема да чекаме долго за првите враќања на мигранти од Европа"- вети Могерини.
Се очекува во наредните месеци со помош на европската дипломатија вработени од Мали, Сенегал и Нигерија да бидат испратени на мисии во еврочленките за идентификување на илегални имигранти без документи. Етиопија ќе помага да издава документи за идентификација на своите граѓани, а на Сенегал да си го подобри граѓанскиот регистар и да започне да издава биометриски пасоши.