ЕУФОРИЈА ВО РЕГИОНОТ: Медиумите пишуваат за успехот на „Медена земја“
Објавено во: Македонија 14 Јануари, 2020
Еуфорија има и во регионот, поради успехот на македонскиот документарен филм „Медена земја“ кој ќе се бори за Оскар.
Српските медиуми пишуваат за двојната номинација на „Медена земја”.
Филмот има две номиинации за престижната награда Оскар во категориите најдобар странски филм и најдобар документарец.
Медиумите од соседството пишуваат детали за содржината на филмот, за екипата и за досега добиените награди, меѓу кои и триумфот на фестивалот „Санденес” во јануари лани.
Би-би-си на српски јазик во текст нсловен „Оскар и земјата на медот: како филм од Северна Македонија влезе во историјата на светскиот филм”, пренесува изјава на продуцентот и монтажер на филмот Атанас Георгиев дека земјава има мала филмска продукција, но многу талентирани уметници и добри приказни може да се најдат на секој чекор.
„Кога филмот освои три награди на фестивалот „Санденс”, кој е основан од актерот и режисер Роберт Редфорд, пишуваа „Гардијан”, „Њујорк тајмс”, „Ролинг стоун” и „Венити фер”, наведува „Данас”.
Хрватски индекс пишува дека филм од регионот заработил дури две номинации за Оскар.
Пред неколку дена хрватските медиуми објавија дека „Медена земја“ ќе се прикажува во нвните кина.
Единствениот македонски филм кој претходно добил номинација за Оскар е „Пред дождот“ на Милчо Манчевски во 1995 година. Уште еден наш филм, но како југословенски кандидат за најпрестижната филмска награда, беше документарецот „Дае“ на Столе Попов пред точно 40 години.
Доделувањето на престижната награда ќе се одржи на 9 февруари во Лос Анџелес.