„Еуроактив“: Проширувањето на ЕУ не е на листата приоритети на грчкото претседателство

Добивај вести на Viber

И покрај претходните тврдења од страна на Атина дека Грција е посветена на проширување на Европската  унија со земјите од Западен Балкан, политиката на проширување не е во приоритетите на Грција за престојното претседателство, пишува „Еуроактив“. Како што јави МИА,  приоритетите на грчкото претседателство, објавени на веб Втраницата на грчкото МНР се поделени во четири поглавја: раст, работни места и кохезија, понатамошна интеграција на ЕУ и еврозоната, миграции, граници и мобилност и поморски политики. „Проширувањето е видливо отсутно од листата на приоритети, и покрај посветеноста од страна на Атина во рамките на заедничката програма на т.н. тројно претседателство - во моментов составено од Ирска, Литванија и Грција - кое го дефинираше проширувањето како ’област од стратешка важност’“ - коментира порталот„Еуроактив“. Грчкиот заменик-министер за надворешни работи, Димитрис Куркулас, за порталот изјавил дека проширувањете отсекогаш било и ќе продолжи да биде врвен приоритет за неговата земја, но додал дека „наместо на големи настани или состаноци, Грција за време на своето претседателство ќе ја турка секоја земја посебно, врз основа на заслуженото“. - Со оглед на тоа што политичката ангажираност е во име на целата Европска унија, нашата цел е да продолжиме со конкретни чекори, прилагодени на специфичните потреби и околности на секој конкретен случај. Во овој контекст, грчкото претседателство ќе биде посветено на промовирање на проширувањето на Унијата и ефективно справување со предизвиците со кои секоја земја кандидат се соочува во овој специфичен момент - изјавил Куркулас.