Eве што пишуваат светските и регионални медиуми за договорот за името
Објавено во: Македонија 17 Јуни, 2018
Во светските медиуми денеска се најде и веста за потпишувањето на договорот меѓу Македонија и Грција.
Вашингтон пост, Ројтерс , Би-Би-Си и ДПА наведуваат дека договорот има за цел да го реши деценискиот спор меѓу двете земји, но и дека треба да биде одобрен од страна на двата парламента, а во Македонија и со референдум.
Според Франс Прес Грција и Македонија потпишаа историски прелиминарен договор за преименување на малата балканска земја во Република Северна Македонија, завршувајќи го спорот меѓу двата соседи од 1991 година. Договорот има за цел да почне да го одмотува еден од најдолгите - и дефинитивно најапсурден - дипломатски спор, кој почна пред 27 години кога Македонија прогласи независност.
Извештаите во бугарските медиуми засега се речиси без коментари, само информации дека е потпишан во грчко село на брегот на Преспанското езеро, и истакнуваат дека „историскиот договор е факт“ и потенцираат дека Ципрас од Заев доби црвена вратоврска. Бугарските медиуми исто така ја пренесуваат и пораката на Фејсбук на премиерот Бојко Борисов, кој ги поздрави премиерите на Македонија и Бугарија и напиша дека договорот за спорот за името го отвора патот на Република Македонија кон ЕУ и НАТО.
Под наслови „За историја: потпишан договор!“, „Република Северна Македонија – историски договор меѓу Атина и Скопје“, електронските изданија на српските медкуми денеска јавуваат за пoтпишувањето на договорот.
За албанските медиуми потпишан е историски договор, со што е ставен крај на долгогодишниот спор околу името, а со кој Македонија сега се вика Република Северна Македонија.Веста со слични наслови ја пренесуваат и хрватските медиуми.