Европската комисија најави мерки против Хрватска

Добивај вести на Viber

Иако во петокот истече рокот за испраќање на одговорот до Брисел, Европската комисија нема добиено одговор од Хрватска за законот за европски налог за апсење, изјави портпаролаката на ЕК, Мина Андреева и најави дека Комисијата поради тоа ќе преземе мерки против Хрватска.

„Според моите сознанија не добивме одговор. ЕК изразува длабоко жалење поради тоа што Хрватска не одговори на ова итно барање“, истакна Андреева.

Хрватска кон крајот на јуни го донесе законот за европскиот налог за апсење, наречен „Лекс Перковиќ“, според кој тој налог не важи за злосторствата извршени пред август 2002 година.

Европската комисија потоа го утврди 23 август како рок до кој Хрватска треба да го усогласи својот закон за европскиот налог за апсење со европските прописи.

Андреева потсети дека потпретседателот на ЕК и комесарка за правда Вивија  Рединг на неколку пати јасно укажала на тоа.

„Чекорот на Хрватска значи дека неколку криминалци, осомничени за убиство на хрватски емигранти во друга европска земја за време на комунистичкиот режим, можат и натаму да се кријат зад хрватските граници“, рече таа.

Андреева додаде дека Рединг ќе ја запознае ЕК со ова прашање следната недела и ќе предложи акција во согласност со членот 39 од хрватскиот пристапен договор.

Членот 39 предвидува „соодветни мерки“, меѓу кои е и кратењето пари од фондовите на Европската унија.