Фицо уште е во болница по минатонеделниот атентат
Објавено во: Свет 24 Мај, 2024
Здравствената состојба на словачкиот премиер Роберт Фицо е „малку подобрена“, соопштија од болницата во која тој се опоравува од критичните прострелни рани при атентатот што се случи минатата недела.
Премиерот на Словачка беше тешко ранет минатата недела од огнено оружје додека се поздравуваше со приврзаниците во градот Хандлови, во напад што ги поттикна стравувањата од продлабочување на поделбите во политички поларизираната земја.
Фицо имаше две долги операции во болницата во градот Банска Бистрица, по што беше кажано дека неговата состојба е стабилна, но сериозна.
Во новото соопштение за Фицо, болницата денеска објави дека „развојот на здравствената состојба на премиерот е стабилна со мало подобрување“.
„Веруваме дека овој напредок ќе продолжи“, додаде болницата, без да елаборира за следните чекори во лекувањето на Фиц.
Неговиот најблизок политички сојузник, вицепремиерот Роберт Калинак, во средата рече дека Фицо засега ќе остане во болницата во Банска Бистрица бидејќи неговиот трансфер во друга институција „дефинитивно не доаѓа предвид“.
Обвинетиот вооружен напаѓач, идентификуван од словачките медиуми како 71-годишниот поет Јурај Цинтула, беше обвинет за обид за убиство и му беше одреден притвор на сослушувањето во саботата.
Според судскиот документ што го видел АФП, осомничениот рекол дека пукал во Фицо за да се спротивстави на владините политики во Украина.
Обвинетиот рече дека не се согласува со одлуката на владата да го укине специјалното обвинителство и да престане да испраќа воена помош за Украина, како и со наводниот прогон на медиумите.
Обидот за атентат ја шокираше Словачка, каде 59-годишниот Фицо ја презеде функцијата во октомври, откако неговата партија Смер победи на парламентарните избори.
По преземањето на четвртиот премиерски мандат, Фицо ги расипа односите со Украина.