Financial Times: Ќе стане ли Ципрас Ото фон Бизмарк на Балканот
Објавено во: Балкан 01 Февруари, 2018
Угледниот Financial Times ја анализира позицијата на грчкиот премиер Алексис Ципрас кој соочува со голем народен и политички отпор во сопствената држава против употребата на терминот „Македонија“ во било какво решение за спорот за името со Македонија.
Од друга страна, пак, дипломатската награда за решавање на спорот за името што може да ја добие е значајна за него и би го претворила во своевиден Ото фон Бизмарк на Балканот, пишува Financial Times во написот под наслов „Ципрас игра покер во врска со Македонија“.
Угледниот британски весник правејќи историски осврт на спорот помеѓу двете земји до денес, нагласува дека околу 60 проценти од Грците се противат на сложено име кое ќе го содржи терминот „Македонија“, а укажува и на илјадниците граѓани кои учествуваа на протестите во Солун минатиот месец, како и на претстојниот протест што е закажан за вo недела во Атина.
FT пишува дека грчката опозициска Нова демократија го нападнала Ципрас што не ги вклучил во разговорите за името и додава дека Грчката црква, која на почетокот му дала поддршка за Ципрас, сега е против него. Во целата оваа мешаница, која според весникот наликува на хаос, е и ставот на ултранационалистите кои се дел од коалицијата во владата на Ципрас, а кои прашањето за Македонија го ставаат во центарот на нивната идентитетска политика.