Добивај вести на Viber
Нова фирма наскоро ќе може да се регистрира само по електронски пат, најави министерот за економија Ваљон Сарачини. Тоа го предвидуваат измените и дополнувањата на Законот за трговски друштва што Министерството веќе следните денови ќе ги достави во владина процедура.
„Со измените се предвидува и целосно укинување од употреба на официјалниот печат, како и лицата кои ги немаат платено придонесите, даноците и царинските давачи или должат по основ на други давачки или на некој начин се на „црната листа и досега го изиграле законот“ да не можат да купат удели во фирма или да пренесат удели во друга фирма“, изјави Сарачини по редовната работна посета на Централниот регистар.
Според податоците на Централниот регистар во Македонија има регистирано околу 103.000 фирми од кои активни се 70 до 80 илјади. За 37.000 фирми во процедура е проверката дали во последните три и повеќе години имале активности или не.
Во 2013 година во Македонија се регистрирани 6.500 нови фирми од кои 300 по електронски пат преку регистрациски агент и без надомест. Лани по нормална процедура од регистарот се избришани 3.750 компании, а 6.100 фирми кои немале активност повеќе од три години биле пријавени за да се избришат.