ФОКУС НА ДЕНОТ: Се бара притвор за Јакимовски, Европа потсетува дека реформите не се завршени

Добивај вести на Viber

Притвор за Стевчо Јакимовски и за уште две лица бара надлежниот јавен обвинител од Основното јавно обвинителство за гонење на организиран криминал и корупција до Судијата на претходна постапка при Основниот суд Скопје 1 Скопје. Лицата се осомничени дека сториле кривично дело Злоупотреба на службена положба и овластување, додека едно од лицата, се сомничи и за кривично дело Бесправно градење.

Според ОЈО во изминатиот период обвинителството донело четири Наредби за спроведување на истражна постапка во кои се опфатени повеќе лица, меѓу кои и поранешниот градоначалник на една скопска општина.

Стевчо Јакимовски, поранешниот градоначалник на општина Карпош пред новинарите извика „Ќе ги тепаме, не им се плашиме“ додека беше префрлан со полициска придружба од старата во новата зграда на Кривичниот суд.

Покрај тоа, претседателот на ГРОМ симболично покажа два прста во знакот на победата. Од утринава тој и уште неколку лица се приведени и даваат исказ кај судија за предистражна постапка.

Времените монтажни објекти на булевар Илинденска во општина Карпош не смеело да бидат предмет на продажба на трите фирми-претприемачи, објави Тони Ангеловски, портпаролот на МВР на денешната прес-конференција по приведувањето на поранешниот градоначалник Стевче Јакимовски и двајца негови соработници.

„Согласно законските одредби не смееле да бидат предмет на правен статус, но сепак од општина Карпош постапиле по барањето и дале согласност за купување на земјиштето и направиле кривично дело злоупотреба на службена положба. Од 2011 до 2017-та превземале дејствија кои не смееле да ги превземат - истакна Ангеловски.

Во ЕУ има оптимизам, но не се знае сигурно дали земјава ќе добие датум за преговори. 

Високата претставничка за надворешна политика и безбедност, Федерика Могерини по денешната средба во Брисел на премиерот Зоран Заев изјави дека е задоволна со каква динамика се движат реформите во Македонија. Сепак, таа е свесна за слабостите кои ќе треба во иднина да се поправат. 

Еврокомесарот Јоханес Хан напомена дека се потребни реформи во судството, борбата против корупцијата и организираниот криминал, реформата на разузнавачките служби и јавната администрација.