ФОКУС НА ДЕНОТ: Сите ја коментираат „метлата“, а Петар Атанасов си поднесе оставка

Добивај вести на Viber

Лавина од реакции кај политиколозите и професорите покрај целата јавност за владината реконструкција.

Професорката Билјана Ванковска на социјалните мрежи со свое видување околу операцијата која таа ја нарече „метличка“. 

Во прилог ви го пренесуваме нејзиниот статус на Фејсбук.

„За оваа ситуација не важи изреката „се тресеше гората, со роди глушец“. Овде станува збор за многу повеќе од изневерени очекувања: можеби некој чекаше радикални кадровски смени на подобро, но од целата метла само Заев се офајди. И тоа лично.

Тоа што премиерот одлучил самиот да ја врши и функцијата министер за финансии не е спорно од формално-правен аспект. До душа, ова влегува во мала сива зона, бидејќи прашањето не е експлицитно уредено, ама на прв поглед не е страшно. Има многу случаи кога премиери одлучуваат да раководат и со некој ресор, НО... НО, за тоа треба да има добра причина! На пример, кога ситуацијата бара итност, кога има кризна ситуација која не трпи одлагање и празнина во владата, т.е. кога не се врши реконструкција туку се пополнува испразнето министерско место во ресор кој е многу важен, итн. На пример, Ципрас веднаш го зеде под свое Министерството за надворешни работи по неочекуваната оставка на Коцијас, а во пресрет на ратификацијата на Преспанскиот договор. Ваквите потези се обично од времен карактер, а не трајни решенија.

Бујар Османи, вицепремиерот за евроинтеграции и воедно портпарол на ДУИ, тврди дека сите министри од владиниот коалиционен партнер се помлади од 40 години и дека Насер Нуредини, кој го превзема министерството за животна средина од Садула Дураки, е експерт за проекти, нешто што бара темелен пристап, според него, во овој ресор.

Османи смета дека менаџерските способности на Нуредини, кој не е член на ДУИ, се неговиот главен адут и дека тој е експерт за „реализација на компелсни проекти“. Нуредини е инвестициски банкар и финансиски советник за банкарство во Лондон и во Виена. Досегашниот министер за животна средина Дураки ќе биде на чело на новото министерството за политички систем и односи меѓу заедниците.

Петар Атанасов по неполна година откако беше назначен за заменик-министер во министерството за образование објави дека си поднесува оставка. Професорот вели дека размислувал за ваквиот потег уште пред премиерот Зоран Заев да ја објави владината реконструкција. Оставката ја соопшти преку писмо упатено токму до Заев во кое вели дека очекуваните промени во образованние не го дале посакуваниот ефект, односно не се остварувале. Вели дека бил член на „Шарената револуција“, но дека не смее да се остави истата „да ги изеде своите деца“.

Малопродажната цена на дизелот, екстра лесното масло за домаќинство и Еуросупер БС-98 од ноќеска на полноќ се зголемува за половина денар. Цената на Еуросупер БС-95 останува непромента.

Според одлуката на Регулаторната комисија за енергетика цената на Еуросупер БС-95 останува 67 денари за литар, на  Еуросупер БС-98 ќе изнесува 69,50 денари, на Еуродизелот 60,50 денари, додека на Екстра лесното масло за домаќинство (ЕЛ-1) изнесува 50 денари.

Се зголемува и малопродажната цена на мазутот и ќе изнесува 33,237денари за килограм.