Фондот за здравство ги намалува цените на тестовите за корона вирусот
Објавено во: Македонија 28 Април, 2020
Фондот за здравствено осигурување ја повлекол референтната цена од 3600 денари за тестирање од Ковид-19 и донел нова одлука за поевтина, односно од 1500 денари за оваа лабораториска услуга, објави Нова ТВ.
Одлуката е донесена на Управен Одбор и преостанува само да биде потврдена од Министерот за здравство Венко Филипче и да биде објавена во Службен Весник. Фондот понатаму ќе ја исплатува висината на цената на оваа лабораториска услугa на сите здравствени установи со кои има склучено договор,
„Со избивање на пандемијата на КОВИД-19, стручните служби на Фондот, врз основа на анализа, ја ревидираа цената на здравствена услуга ПСР тестирање и беше денесена Одлука за нова цена од 3600 денари. Заради јавно достапните информации дека во приватните лаборатории оваа здравствена услуга се наплатува 1500 денари, Фондот ја повлече донесената одлука за цена од 3600 и донесе нова со која цената на ПСР тестирање за КОВИД-19 ќе биде 1500 денари“, гласи одговорот од ФЗОСМ.
Пред еден месец Фондот за здравство ја објави цената на тестовите за Корона вирусот. Посочија дека постојат повеќе различни лабораториски услуги со референта цена од 3.000 до 5.500 денари.