Фото и видео: Меркел го угости Заев во Берлин
Објавено во: Македонија 29 Април, 2019
Северна Македонија и Договорот од Преспа се позитивен пример на Балканот и тој успех е охрабрување за сите земји учеснички на Конференцијата за Западен Балкан, заклучиле премиерот Зоран Заев и германската канцеларка Ангела Меркел на работниот состанок кој се одржа пред почетокот на Конференцијата за Западен Балкан во Берлин.
Во Берлин Заев е со заменик претседателот на Владата за европски прашања, Бујар Османи и министерот за надворешни работи, Никола Димитров. Тој беше пречекан од канцеларката на Сојузна Република Германија, Ангела Меркел.
„Премиерот Заев и канцеларката Меркел ја истакнаа важноста на економските придобивки кои ги носи билатералната соработка меѓу Северна Македонија и Грција и потенцираа дека ваквите соработки треба да се интензивираат низ целиот регион.
Премиерот Заев на средбата нагласи дека соработката, пријателството и реформите кои ги спроведува земјата се сериозни аргументи за позитивна одлука од страна на Европската Унија за почеток на преговорите во текот на летото, стои во владиното соопштение.