ФОТО+ВИДЕО: Поплави од библиски размери – вонредна состојба во Солун и Пелопонез

Добивај вести на Viber

Во Солун и Пелопонез во Грција е прогласена вонредна состојба поради поплавите.

На состанокот во градот Каламата, на кој присуствуваше владина делегација, одлучено е да се преземат вонредни мерки. Два дена имаше обилни дождови во земјата, при што во поплавите се удавија четири лица, а едно се смета за исчезнато. Според противпожарната служба, сите четири жртви биле од јужен Пелопонез и сите биле постари граѓани. Се работи за 80-годишна жена која живеела сама во стан во Каламата, 62-годишна жена со проблеми со движење во селото Пидима, 90-годишен маж во селото Туриа,  и уште еден постар човек, чија возраст не се открива, а чие тело беше пронајдено на околу 150 метри од неговиот дом во руралниот дел од Лаконија.

Властите се плашат дека бројот  на жртви може да се зголеми, особено во селата чии жители се претежно стари лица.

Спасувачките тимови успеаа да извлечат 24 лица во Солун, 29 се спасени во Лаконија и 21 во Месинија.  

Поплавите предизвикаа голема штета на стотици домови, бизниси, фарми, патишта, мостови и добиток.

Иако нема официјални проценки на штетите, градоначалникот Каламата, Панајотис Никас изјави дека најмалку 38 домови и пет училишта се оштетени во градот.

Се коментира дека оваа поплава беше со библиски размери.