(ФОТО) Во оваа држава се случи обид за државен удар
Објавено во: Свет 07 Јануари, 2019
Обид за државен удар имаше во Габон.
На улиците има тенкови и борбени возила.
Група војници денеска се обидоа да ја преземат власта, додека болниот претседател на земјата е во странство. Војниците рано утринава упаднале во радио станицата во главниот град Либревил и го повикале народот „да се дигне“. Во исто време се слушнати истрели, но Владата по неколку часа соопшти дека „ситуацијата е ставена под контрола“. Четворица од петте војници кои влегоа во радиото се уапсени, а еден е во бегство.
Полицајците се распоредени во главниот град и ќе останат таму и во наредните денови за да го одржуваат редот.
Претседателот Али Бонго, кој минатата година доживеа мозочен удар додека беше во Саудиска Арабија, живее во приватна резиденција во главниот град на Мароко, Рабат. Тој имаше телевизиско новогодишно обраќање, но не е во земјата од октомври. Додека е отсутен овластувањата се пренесени на потпретседателот и на премиерот.
Семејството на претседателот Бонго владее со земјата повеќе од 50 години. Неговиот татко Омар ја презеде власта во 1967 година и стекна имиџ на клептократ – стана еден од најбогатите луѓе во светот, благодарение на богатството на земјата со нафта. Али Бонго е избран за претседател во 2009 година, по смртта на неговиот татко. Во 2016 година е реизбран на претседателските избори на кои имаше крвави насилства и обвинувања за изборна измама. Третина од населението живее во сиромаштија, иако земјата има нафта.
Африканската унија „остро го осудува“ обидот за воен удар и целосно ги отфрли сите можности за неуставна промена на власта.