(ФОТО+ВИДЕО) ХРВАТ КОЈ ЖИВЕЕ ВО КИНА: Има паника, улиците се празни, на интернет се појавуваат секакви видеа

Добивај вести на Viber

Фрањо Тушек од Хрватска кој живее во градот Хаикоу во провинцијата Хаинан, во Кина, вели дека улиците се празни, постои страв и паника поради појавата и ширењето на коронавирусот.

За себе лично,  раскажува дека деновиве имал висока температура, поради што малку се исплашил, но потоа се покажало дека се работи за настинка. Ова момче смета дека ако се земе в предвид колкав е бројот на жители, а колкав е бројот на луѓе кои се инфицирани, шансите некој да се зарази се мали. Смета дека кај младите и здрави луѓе има помал ризик да се заразат и да имаат фатални последици. 

„Улиците се релативно празни, не работат интернет кафулињата. Паника има, иако не е претерана, но постои. На социјалните мрежи се шират секакви видеа, кои имаат неточни и непроверени  информации, и тоа создава паника. Во мојот град, каде сега живеам има 2 милиони луѓе, а заразени се 9. Едноставна математика, многу се мали шансите“, раскажува Тушек.

Додава дека коронавирусот е фатален претежно за луѓето кои веќе имаат здравствени проблеми.

„Сега е кинеска Нова година, нема многу луѓе по улиците, сите носат маски. Но, секако на улиците има помалку луѓе од вообичаено. Приватните бизниси се затворени, тоа е поради Новата година, но и поради вирусот“, додава тој.

Кинеската комисија за надзор соопшти дека најостро ќе ги казни сите државни службеници и функционери кои на своите работни места нема да ги почитуваат мерките пропишани во борбата против коронавирусот.

Националната здравствена комисија на Кина вчера објави дека вкупниот број на смртни случаи од корона-вирусот, заклучно со вчерашниот ден, е 170, бројот на заразени се зголемил за повеќе од 1.700 случаи додека како сомнителни се водат 12.167 лица.

Повеќе земји ги прекинаа сообраќајните врски до Кина, поради вирусот.

Во хрватскиот град Шибеник, туристи од Тајван носеа натпис со кој порачаа дека не се од Кина.

Во Скопје човек снимаше луѓе со мобилен телефон и ги навредуваше, мислејќи дека си Кинези, по што потоа беше откриено дека станува збор за луѓе од Јужна Кореја, кои во земјава држеле работилници.

Вирусот сега се прошири на сите региони во Кина.  Но, вчера стигна и вест дека дел од заболените се излечени од опасниот вирус. 

Сања Атанасовска