Фуере за можната блокада од Бугарија: Некои земји го користат членството во ЕУ за да наметнат националистичка агенда
Објавено во: Македонија 07 Октомври, 2020
Заканите за блокирање на преговарачкиот процес со ЕУ од страна на Бугарија треба да ја загрижи Европската унија, вели екс амбасадорот на ЕУ Ерван Фуере, во изјава за МИА.
Како што јави дописничката на МИА од Брисел по објавувањето на извештајот за реформскиот напредок на Македонија и другите земји од регионот, поранешниот ЕУ амбасадор се осврнува на најавите за можна блокада од Бугарија и предупредува дека тие можат да го загрозат регионот.
– Ова прашање е многу загрижувачко затоа што покажува дека некои земји членки го користат членството во ЕУ за да наметнат националистичка агенда, ова е нешто што ЕУ не смее да го потцени, ниту земјите членки ниту институциите на ЕУ, ова е многу сериозен проблем, кој сме го виделе и во минатото со Словенија и Хрватска и покажува колкава е тежината на историјата на западниот Балкан – вели Фуере.
За Фуере корупцијата, исто така, е еден од главните проблеми за земјата и покрај одреден напредок до сега.